ШУТИС-ийн ХХҮДС-ийн эрдэм шинжилгээ, судалгааны чиглэл, нөөц бололцоог  "СU" ХХК-ын хоол үйлдвэрлэлийн практик хэрэгцээтэй уялдуулах замаар олон талт түншлэлийн эхлэлийг тавих зорилгоор өглөөний уулзалтыг 2025 оны 10-р сарын 23-ны өдөр зохион байгуулав.

• Энэхүү уулзалтад "CU" ХХК-ийн хоолны үйлдвэрийн технологич, инженер, бүтээгдэхүүн хөгжүүлэлтийн болон удирдлагын багийн 27 төлөөлөл, ШУТИС-ийн ХХҮДС-ийн эрдэмтэн нарийн бичгийн дарга Г.Солонго, профессор М.Пүрэвжав, Б.Майзул эрдэм шинжилгээ, инновацийн ажилтан У.Батчулуун, ахлах багш Б.Арвинбаяр, Н.Сугар нар оролцов.

Уулзалтын үеэр талууд дараах чиглэлээр хамтран ажиллах боломжуудын талаар дэлгэрэнгүй санал солилцсон байна. Үүнд:

• Эрдэм шинжилгээ, судалгаа: Хоол үйлдвэрлэлийн өнөөгийн чиг хандлага, тулгамдаж буй асуудлуудын хүрээнд хамтарсан эрдэм шинжилгээний хурал зохион байгуулах, судалгааны ажлуудыг гүйцэтгэх
• Бүтээгдэхүүн хөгжүүлэлт: Бүтээгдэхүүний чанар, аюулгүй байдлыг сайжруулах, шинэ бүтээгдэхүүн хөгжүүлэхэд зөвлөгөө, дэмжлэг үзүүлэх
• Сургалт, хөгжүүлэлт: Салбарын мэргэжилтнүүдэд зориулсан богино болон урт хугацааны, зэргийн болон зэргийн бус сургалтуудыг зохион байгуулах.
• Оюутны дадлага, тэтгэлэг: "CU" нь олон улсын HACCP стандартын гэрчилгээг авсан бэлэн хоолны үйлдвэртэй бөгөөд энэ нь оюутнуудад орчин үеийн технологи, стандартад суурилсан дадлага хийх боломжийг олгох юм. Иймд хүнсний чиглэлээр суралцаж буй оюутнуудыг ажлын байранд дадлагажуулах "Дадлагажигч оюутан" хөтөлбөрийг хэрэгжүүлэх
• ШУТИС-ын хүнс, хөнгөн үйлдвэрийн чиглэлээр хэрэгцээт, зах зээлд олдоц муу, ховор  ажлын байруудад сурч буй оюутнуудын дунд тэтгэлэг зарлах
• Зах зээлд таниулах: Хүнс, хоол үйлдвэрлэлийн талаарх эерэг мэдээллийг олон нийтэд түгээх, зах зээлд чиглэсэн таниулах ажлуудыг хамтран зохион байгуулах

Уулзалтын үр дүнд дээрх чиглэлүүдийн хүрээнд урт хугацааны хамтын ажиллагааны гэрээний төслийг боловсруулж, хамтран ажиллахаар тохиролцлоо.

Энэхүү хамтын ажиллагаа нь их сургууль болон хувийн хэвшлийн уялдаа холбоог бэхжүүлж, онолын мэдлэгийг практикт нэвтрүүлэх, улмаар хүнс үйлдвэрлэлийн салбарын хөгжилд бодит хувь нэмэр оруулах чухал ач холбогдолтой юм.